நின்ற நாராயணன்

20 டிசம்பர் 2015 தீபம் இதழில் வெளியான என் ஆலய தரிசனக் கட்டுரை...

நின்ற நாராயணன்....திருத்தங்கல்

 

ஸ்ரீமன் நாராயணனை பல திருத் தலங்களில் அமர்ந்த கோலத்திலும், கிடந்த கோலத்திலும் நாம் தரிசனம் செய்ததுண்டு. ஆனால் நின்ற கோலத்தில் தரிசிக்க, அதுவும் ஸ்ரீதேவி, பூதேவி, நீளாதேவி, ஜாம்பவதி ஆகிய நான்கு தேவியருடன் கிழக்கு நோக்கிய திருமுக மண்டலத்துடன் நின்ற வண்ணம்  கோலாகலமாகக் காட்சி தரும் அற்புதக் கோலம் காண விருதுநகர் மாவட்டத்தில் உள்ள திருத்தங்கல்  தலத்திற்கு செல்ல வேண்டும். 

புராணப் புகழ் பெற்றதும், ஆழ்வார்களால் மங்களாசாசனம் செய்யப் பட்டதுமான  இந்த திவ்யதேசம் மூர்த்தி, தலம், தீர்த்தம் என்ற முப்பெருமையும் கொண்டது. 1300 ஆண்டுகள் பழமையான இத்தலம் 108 திவ்ய தேசத்தில் 48வதும், பாண்டிய நாட்டு திவ்ய தேசங்களில் ஐந்தாவது திவ்ய தேசமாகவும் விளங்குகிறது. இது குடவரைக் கோயிலாகும். இத்தலப் பெருமை பிரம்மாண்ட புராணத்தில் காணப்படுகிறது. 

ஆலமரத்தை தலமரமாகக் கொண்ட இவ்வாலயத்தில் , வைகானச ஆகம முறைப்படி பூஜைகள் நடை பெறுகின்றன.  'திருத்தங்கல் கண்டால் மறுத்தங்கல்  கிடையாது' என்ற பழமொழி  இத்தலத்தை தரிசிப்பவர்க்கு இனி மறு பிறப்பு கிடையாது என்பதைத் தெளிவாகச் சொல்லி இத்தலத்திற்கு சிறப்பு சேர்க்கிறது.

இத்தல இறைவன் இங்கு கோயில் கொண்டது எவ்வாறு? அதற்கான அழகான கதைஇது! பெருமாள் பாற்கடலில் யோக நித்திரையில் இருந்த சமயம் ஸ்ரீதேவி, பூதேவி, நீளாதேவி மூவருக்குள்ளும் 'யார் பெரியவர்?' என்ற சர்ச்சை ஏற்பட்டது. ஸ்ரீதேவியின் தோழிகள் ஸ்ரீதேவியே நாரணனின் அன்புக்குப் பாத்திரமானவள் என்றும், பூதேவியின் தோழியர் பூமியே உலகைத் தாங்குவதால் பூதேவியே உயர்ந்தவள் என்றும், நீளாதேவியின் தோழிகள் நீளாதேவி ஜல வடிவமானவள். அவள் மடியிலேயே பகவான் பள்ளி கொண்டிருக்கிறாள் என்றும் சண்டையிட, கோபித்த ஸ்ரீதேவி தங்கால்மலை என்ற இத்திருத்தங்கல் மலை அருகில் வந்து செங்கமல நாச்சியார் என்ற திருப் பெயருடன் நாராயண மந்திரத்தை ஜபித்துக் கொண்டு தவம் இருந்தாள். யோகம் கலைந்து  எழுந்த பரந்தாமன் தேவியின் தவத்திற்கு மகிழ்ந்து கருடன்  மீது வீற்று ஸ்ரீதேவிக்கு காட்சி தந்தார். 

எம்பெருமானைக் கண்ட தேவி அவர் கால்களில் வீழ்ந்து வணங்கித் துதித்தாள். பெருமான் 'நீயே எனக்கு என்றும் பிரியமானவள். உன்னால்தான் நான் ஸ்ரீயம்பதியாக விளங்குகிறேன்.நீயே பெரிய பிராட்டி என்ற பெயருடன் விளங்குவாய்' என்று கூற, தேவியும் மனமகிழ்ந்து 'தாங்கள் இம்மலையில் பாற்கடல் போல சே ஷ சயனத்தில் என்னுடன் எப்போதும் எழுந்தருளி இருக்க வேண்டும்' என வேண்ட, நாரணரும் 'நீ தவம் இருந்த இவ்விடம் இனி ஸ்ரீக்ஷேத்திரம் என விளங்கும்'எனப் பணித்து அங்கேயே எழுந்தருளி விட்டார். 

கணவரின் பின்னால் வந்த பூதேவியும், நீளாதேவியும் மகாலக்ஷ்மியிடம் மன்னிப்பு வேண்ட தேவியும் அவர்களை தழுவி ஏற்றுக் கொண்டாள். திருவாகிய  லக்ஷ்மி தேவி இங்கு  தங்கியதால்  இத்தலம் திருத் தங்கல்  என்றாயிற்று.

மூன்று தேவிகளுடன்  ஜாம்பவதி இங்கு இணைந்த வரலாறு இது.ராமாவதாரத்தில் ஜாம்பவானாக இருந்தவன், கிருஷ்ணாவதாரத்தில்  சியமந்தக மணியை  திருடிக் கொண்டு செல்ல, கிருஷ்ண  பகவானால் மோட்சம் அடைந்தான். அச்சமயம் தன் மகளான ஜாம்பவதியை பரமன்  மணம் செய்துகொள்ள வேண்டும் எனக் கேட்க, நாராயணரும் இவ்விடத்தில் மணம் செய்து கொண்டதாக புராணக் கூற்று. ஜாம்பவதி  பெருமானுடன் இணைந்து அருள் தரும் ஒரே திவ்யஸ்தலம் இது மட்டுமே.

ஒருமுறை ஆதிசே ஷனுக்கும், ஆலமரத்திற்கும் இடையே யார் பெரியவர் என்ற  ஏற்பட்டது.இருவரும் பிரம்மாவிடம் சென்று கேட்க அவர், 'ஆதிசே ஷன்   மீதுதான் பரமன் எப்பொழுதும் பள்ளி கொள்கிறார்.யுகம் அழியும்போது மட்டுமே ஆலிலையில் பள்ளி கொள்வதால் ஆதிசே ஷனே பெரியவர்' என்று சொல்ல, வருத்தமடைந்த ஆலமரம் கடும் தவம் செய்தது.  அதில் மகிழ்ந்த விஷ்ணு ஆலமரத்தின் விருப்பத்தைக் கேட்டார். 'தாம் எப்போதும் கீழே உதிரும் என்  இலைகளின் மேல் பள்ளி கொள்ள வேண்டும்' என வேண்ட, 'நீ ஸ்ரீதேவி தவம் செய்யும் திருத்தங்கலில் மலையாக இருப்பாய். நான் திருமகளை மணம் செய்ய வரும்போது அங்கு வந்து உன்னடியில் நின்றும், பள்ளி கொண்டும் அருள்வேன்' என்றார்.ஆலமரம் இங்கு மலை வடிவில் தங்கியதால், தாங்கும் ஆல மலை என்ற பெயர் நாளடைவில்  தங்காலமலை  என்றாயிற்றாம்.

ஒரு சமயம் கங்கை முதலான 61 நதி மங்கையர் இந்த மலையில் தங்கியிருக்கும் நாராயணரிடம் 'எங்களில் நீராடுவோரின் பாபங்கள் நிறைந்த எங்களை அப்பாபச் சுமையில் இருந்து விடுபட அருள வேண்டும்' எனக் கேட்டனர். பகவானும் 'இக்கோயிலின் வாயிலிலுள்ள பாபநாச தீர்த்தத்தில் நீராடினால் உங்கள் பாபங்கள் நீங்கும். இக்குளக் கரையில் செய்யும் தேவகாரியங்கள்  ஒரு கோடியாகப் பலன் பெறும். இதில் நீராடுவோர் முக்தி அடைவர்' என்று அருளினார். இங்குள்ள பாபநாச தீர்த்தம் மிக விசே ஷமானது.

இங்குள்ளபாஸ்கர தீர்த்தம் ஒரு அந்தணரை அறியாமல் கொன்றதால் சூரிய தேவனுக்கு ஏற்பட்ட  பிரம்மஹத்தி தோஷம் நீக்கிய சிறப்பு பெற்றது. ஊருக்கு வடக்கே ஓடும் அர்ச்சுன நதியும் இவ்வாலய தீர்த்தமாகப் போற்றப் படுகிறது. பாண்டவர்கள் வனவாசத்தின் சமயம் இங்கு வந்தபோது அர்ச்சுனன் கங்கையை நினைத்து பூமியில் வருணாஸ்திரத்தை விட கங்காதேவி பெருக்கெடுத்து வந்தாள். இந்நதி மிகப் புனித நதியாகும்.இவ்வாறு மூர்த்தி, தலம், தீர்த்தம் இவற்றின் சிறப்புகளைக் கண்டோம்.

இனி  நம்பெருமானின் சந்நிதிக்கு செல்வோம். ஆலயத்திற்கு சில  படிகள் ஏறிச் செல்ல வேண்டும். அழகிய வேலைப்பாடுகளுடன் கூடிய வண்ணப் பதுமைகள் காட்சி தரும் முதல் கட்டில் அர்த்த மண்டபத்தில்  பெருமாள் போக சயனராக  தேவியருடன் பள்ளி கொண்ட பெருமாள் ஸ்ரீரங்கநாதராக ஆனந்தக் காட்சி தருகிறார். ஆண்டாளைத் திருமணம் செய்ய வந்த ஸ்ரீரங்கத்து அழகிய மணவாளரே இங்கு தங்கி பின் ஸ்ரீவில்லிபுத்தூருக்கு சென்றதாக வரலாறு. பெருமான் பள்ளி கொண்ட திருக்கோலத்தில் மனத்தை மயக்குகிறார்!

 இரண்டாம் கட்டில் நான்குகால் மண்டபம், வாகன அறைகள் உள்ளன. தாயார் செங்கமல நாச்சியாரின் சன்னதி கிழக்கு நோக்கி அமைந்துள்ளது.இங்கு தேவி உயர்ந்து நின்ற திருக் கோலத்தில், வலக்கையில் அபய முத்திரையும், இடக் கையைத் தொங்க விட்டும் நின்ற நிலையில் தரிசனம் தருவது  எந்த ஆலயத்திலும் காணக்   கிடைக்காத காட்சி. தாயாரின் அழகும், அருகளும் பொங்கும் திருமுகத்திலிருந்து கண்களை விலக்க முடியவில்லை. நாம் வேண்டுவதை உடன் நிறைவேற்றித் தரும் வரப்பிரசாதியாம் இந்த அன்னை.தேவியிடம் எதையும் கேட்கத் தோன்றாது, மனம் அவளுடனேயே ஒடுங்கி விடும் நிலை ஏற்படுகிறது. திருமணம், பிள்ளைப்பேறு, வேலை என்று எதை வேண்டிக்கொண்டும் அம்மனுக்கு ஒன்பது கஜம் நூற்புடவை வாங்கிச்  சாத்துவதாக வேண்டிக் கொண்டால் அவை விரைவில் நிறைவேறுமாம்.இந்த நாச்சியாருக்கு தினமும் திருமஞ்சனம் உண்டு. தாயாருக்கு ஆராதனம் தொடங்கிய பின்பே பெருமாளுக்கு தொடங்கும்.

இங்குள்ள துவஜஸ்தம்பம் தாண்டி சில படிகள் ஏறிச் சென்றால் பெருமானின் மகாமண்டபத்தில் இறைவன் சன்னிதிக்கு  எதிரில் கருட பகவான் நான்கு கரங்களுடன் நின்ற நிலையில் காட்சி தருகிறார். மிக அரிதாகக் காணப்படும் நிலையில் கீழிரு கரங்கள் கூப்பியும்,மேலிரு கைகளில் அமுத கலசமும், சர்ப்பமும் வைத்துக் கொண்டிருக்கிறார். தன்  எதிரியாகிய பாம்பைக் கையில் நட்புடன் கருடன் வைத்துக் கொண்டிருப்பதால், இங்கு வழிபடுவோருக்கு  எதிரிகளால் துன்பம் நேராது என்பது நம்பிக்கை. 

சோமச்சந்திர விமானத்தின் கீழ் கிழக்கு நோக்கிக் காட்சி தரும் கருவறையில்  பதினோரு திருவுருவங்களுடன் நின்ற கோலத்தில் சுதையாலான வாசுதேவப் பெருமான் காட்சி தருவது எந்த ஆலயத்திலும் காண முடியாத சிறப்பு. தெய்வீக வாசுதேவப் பெருமான் தான் அருள் புரிந்த அத்தனை பேருடனும் கர்ப்பக்கிரகத்தில் காட்சி தருகிறார்! மூலவரின் வலப்பக்கம் அன்ன நாயகியாகிய ஸ்ரீதேவி, அம்ருத நாயகியாகிய பூதேவி, மார்க்கண்டேய ரிஷி, கருடன், அருணன் (சூரியனின் சாரதி) ஆகியோரும்,இடப்பக்கம் அனந்த நாயகி என்ற நீளாதேவி, ஜாம்பவதி, அநிருத்தன், உஷை மற்றும் பிருகு மகரிஷி ஆகியோருடன் நடுவே வலது திருக் கையால் தன் திருவடிகளைக் காட்டிக் கொண்டு 'என் பாதங்களைச் சரணடைவோரை நான் கைவிட மாட்டேன்' என்பது போலும், இடக்கையை ஒயிலாக இடுப்பில் வைத்துக் கொண்டும்,அற்புதமான தரிசனம் தரும் ஐயனை உள்ளம் உருகி, கண்ணீர் பெருக உன்மத்தமாகி நாராயணா...நாராயணா என்று சொல்வதைத் தவிர வேறு வேண்டுதல்கள் நம் மனதில் தோன்றுவதில்லை.உற்சவர் திருத்தங்கலப்பன் எனப் படுகிறார். அவரும் கொள்ளை அழகுடன் காட்சி தருகிறார்.பெருமாளுக்கு விசே ஷ நாட்களில் தைலக் காப்பு நடைபெறும்.பிரகாரச் சுற்றில் ஆண்டாளும், தாண்டவக் கண்ணனும் எழுந்தருளியுள்ளனர்.

இந்த ஆலயக் கருவறையில் உஷையும் அநிருத்தனும் எழுந்தருளியது எவ்வாறு என்று பார்ப்போம். 'உ ஷா பரிணயம்' என்று நாம் கதாகாலட்சேபம் கேட்டிருப்போம். மகாபலி சக்கரவர்த்தியின் மகன் வாணன் என்ற அசுரன். அவன் மகள் உஷை. அவளது கனவில் ஒரு நாள் அழகிய வாலிபனைக் கண்டவள் அவனையே மணம் செய்ய விரும்பி அவளது  தோழி சித்ரலேகையிடம்  தான் கனவில் கண்ட ஆடவனின் அடையாளங்களைச் சொல்லி படம் வரையும்படிக் கூற, அவ்வாலிபன் ஸ்ரீக்ருஷ்ணனின் பேரன் அநிருத்தன் என்று அறிந்து கொண்டார்கள்.உஷையின் வற்புறுத்தலால் சித்ரலேகை அவனை துவாரகை சென்று கட்டிலுடன் தூக்கி வந்தாள். கண் விழித்துப் பார்த்த அநிருத்தன் நடந்ததை அறிந்து அவளைக் காந்தர்வ மணம் செய்து கொண்டு அந்தப்புரத்தில் வாழ்ந்து வந்தான்.இதை அறிந்த வாணன் கோபம் கொண்டு அவனை சிறையில் அடைத்தான். விபரம் தெரிந்ததும் கிருஷ்ணர் படையுடன் வந்து பாணனை வென்று அநிருத்தன், உஷையின் திருமணத்தை துவாரகையில் நடத்த அழைத்துச் சென்றார்.

அச்சமயம் திருத்தங்கலில் கடுமையான தவத்தில் இருந்த புத பகவானின் பிள்ளையான புரூரவ சக்கரவர்த்திக்கு கண்ணன் தரிசனம் கொடுத்து அருளினார். புரூரவன் ஆசைக்கிணங்க அநிருத்தன், உஷை திருமணத்தை திருத்தங்கலிலேயே நடத்திய கண்ண பிரான் தாமும் மனைவியருடன் திருக் கல்யாணக் காட்சி தந்தருளி அவ்விடத்திலேயே அனைவருடனும் ஆலயம் கொண்டார். தாம் விரும்பும் வாழ்க்கைத் துணையை மணக்க விரும்புவோரும், இனிய தாம்பத்திய வாழ்க்கையை விரும்புவோரும் வழிபட வேண்டிய இறைவன் இவர். இத்தனை சிறப்புகளோடு திகழும் இந்த ஆலயத்தை வாழ்வில் ஒருமுறையேனும் தரிசிக்க வேண்டியது அவசியம்.

அனுமனும், சக்கரத்தாழ்வாரும் தனி சந்நிதிகளில் அருள் பாலிக்கின்றனர்.இத்தலம் பூதத்தாழ்வாராலும், திருமங்கை ஆழ்வாராலும் மங்களாசாசனம் செய்யப்பட்டது. சித்ரா பௌர்ணமி, வைகாசியில் வசந்தோத்சவம்,ஆனியில் பிரம்மோத்சவம், ஆவணி பவித்ரோத்சவம், புரட்டாசி கருட சேவை, சித்ரா பௌர்ணமி, பங்குனியில் திருக்கல்யாண உத்சவம் ஆகிய திருவிழாக்கள் விமரிசையாகக் கொண்டாடப்படுகிறது.  

இவ்வாலயம் விருதுநகரிலிருந்து சிவகாசி செல்லும் வழியில் 20 கிலோமீட்டர் தூரத்தில் அமைந்துள்ளது. 
ஆலய நேரம். காலை 6--9  மாலை 4--8 
தொடர்புக்கு...9442665443, 9443570765

தத்தாத்ரேயர் ஜயந்தி....தத்தகிரி

டிசம்பர் 20, 2014  தீபம் இதழில் வெளியான என் ஆலய தரிசனக் கட்டுரை.

மும்மூர்த்தி ஸ்வரூபமாக, அத்திரி, அனுசூயா தம்பதியரின் மைந்தனானவர் ஸ்ரீ தத்தாத்ரேயர். அவதூத சந்நியாசிகளின் ஆதி குரு இவர்தான். வட  இந்தியப் பகுதிகளில் ஸ்ரீதத்தரின் வழிபாடு மிகப் பிரசித்தம். தமிழகத்திலும் தத்தாத்ரேயருக்கென்று முதன் முதலில் கோயில் உருவான தலம் சேந்தமங்கலம்.ஒரு சிறிய குன்றின் மீது  சில படிகள் ஏறிச் சென்றால் மெல்லிய தென்றல் வீசும் அழகான, அமைதியான  சூழ்நிலையில் ஆலயம் அமைந்துள்ளது.

மேலே ஆலயத்துள் இரண்டு சந்நிதிகள் மட்டுமே உண்டு. முத்தேவர்களான சிவன், விஷ்ணு, பிரம்மா இணைந்த தத்தப் பெருமான் உயர்ந்து நின்று அருள்காட்சி தருகின்றார். தரிசிப்பவர் மனத்தைக் கொள்ளை கொள்ளும் அழகு. முருகப் பெருமானோ பெயருக்கேற்றார்போல அற்புத அழகில் கையில் வேலும், அபய ஹஸ்தமுமாக முறுவல் கொஞ்சும் இதழுடன் நம்மை நோக்கி 'என்னிடம் வந்தபின் உனக்கு கவலை ஏன்?' என ஆறுதல் அளிப்பதுபோல் காட்சி தருகிறார்.  

இந்த சிலைகள் பிரம்மாண்டமான உயரத்துடன், அழகிய தோற்றத்துடன் காட்சி தருகின்றன.இவ்வாலயம் அமையக் காரணமானவர் ஸ்ரீ ஸ்வயம்பிரகாச பிரம்மேந்திர சரஸ்வதி அவதூத ஸ்வாமிகள். புதுகையில் அதிஷ்டானம் கொண்டுள்ள ஸ்ரீஸ்ரீ ஜட்ஜ் ஸ்வாமிகளின் சீடர் அவர்.இவர் தனிமையை விரும்பி சேந்தமங்கலத்துக்கு அருகில் சந்யாசிகரடு என்ற குன்றில் தவம் புரிந்தார்.

இவர் இமயமலை சென்றபோது தத்த பெருமான் இவர் முன் தோன்றி தனக்கு ஒரு ஆலயம் அமைக்குமாறு கூற, அதன்படி உருவானதே இவ்வாலயம். தன்னுடைய ஜீவ சமாதி அமைவதற்கு ஏற்ற இடம் இது என்று உணர்ந்த ஸ்வாமிகள் இவ்விடத்தில் தத்த ஆலயம் அமைக்க எண்ணம் கொண்டார். எல்லா இடங்களையும் போல இந்த இறைவனின் மையத்தில் உள்ள முகம் விஷ்ணுவுடையது இல்லாமல், சிவ பெருமானுடையதாக அமைந்துள்ளது இத்தல சிறப்பாகும். 1931ம் ஆண்டு மே மாதம் 29ம் நாள் இவ்வாலயம் கும்பாபிஷேகம் செய்யப்பட்டது.1948ம் ஆண்டு டிசம்பர் 29 அன்று ஸ்ரீ ஸ்வயம்பிரகாச ஸ்வாமிகள் ஜீவ  சமாதி அடைந்தார்.அவரது விருப்பத்தின்படி ஸ்ரீ தத்தருக்கு முன்பாக அவரது புனித சமாதி அமைந்துள்ளது. இவரது அதிஷ்டானமும் மலையடிவாரத்திலேயே மிக அமைதியான சூழலில் அமைந்துள்ளது. ஒவ்வொரு வருடமும் நடக்கும் அவரது ஆராதனையில் விபூதி வாசனை ரூபத்தில் அவர் இன்றும் பலருக்கும் பிரத்யக்ஷமாவதாகக் கூறப்படுகிறது. 

1983ம் ஆண்டு ஜனவரி 20ம் நாள் ஸ்ரீ சாந்தானந்த ஸ்வாமிகளால் இன்னொரு சந்நிதியில் முருகப் பெருமானின் உருவம் அமைக்கப் பட்டு கும்பாபிஷேகம் செய்யப்பட்டது.

மலை ஏறிச் செல்லும் வழியில் அழகுற அமைந்துள்ள மண்டபத்தில் பிரம்மாண்டமான சிலா ரூபங்களைக் காண்கிறோம்.பஞ்சமுக கணபதி, வனதுர்க்கை, ஐயப்பன், சனீஸ்வரர், தட்சிணாமூர்த்தி....என எல்லா வடிவங்களுமே பிரம்மாண்டம். தற்காலத்தில் அமைக்கப்படும் பிரம்மாண்ட சிலை வடிப்பின் துவக்கம் இங்கிருந்தே தொடங்கியது என்று கூடச் சொல்லலாம்.இவற்றைத் தொடங்கி வைத்தவர் ஸ்ரீ ஸ்வயம்பிரகாசரின் சீடரான ஸ்ரீ சாந்தானந்தர்.சேலம் மாவட்டம் ஸ்கந்தகிரியில் உள்ள கந்தாஸ்ரமம், புதுக் கோட்டையிலுள்ள ஸ்ரீ ஜட்ஜ் ஸ்வாமிகளின் அதிஷ்டானம், சென்னையில் ஓம் ஸ்ரீ ஸ்கந்தாஸ்ரமம் ஆகியவை இவர் திருப்பணிதான்.

அமைதியான ஆலய சூழல் தியானம் செய்ய ஏற்றதாக அமைந்துள்ளது. திருமுருக கிருபானந்த வாரியார் சுவாமிகள்  இந்த கோவிலில் அமைதி மற்றும் சாந்தம் பெறுவதற்காக அடிக்கடி வந்து சென்றதாக சொல்லப்படுகிறது.

குருவருள் திருவருளைச் சேர வைக்கும்.அவ்வகையில் ஸ்வயம்பிரகாசரின் அதிஷ்டானமும், ஆதிகுரு தத்தரின் சந்நிதியும் அமைந்துள்ள சேந்தமங்கலத்தை தரிசித்தால் வாழ்வில் மங்கலம் சேரும்.

ஆலயம் நாமக்கல்லில் இருந்து 10 கி.மீ.

தரிசன நேரம்...காலை 6 1/2-12;   மாலை....5-7 1/2

தொடர்புக்கு...9944848962

தி இந்துவில் வெளியான என் கருத்து...

30 நவம்பர், 2014 தி இந்து தமிழ் செய்தித் தாளின் பெண்களுக்கான இணைப்பான  'பெண் இன்று' பதிப்பில் விவாதக் களம் பகுதியில் வெளியான என் கருத்து...

தி இந்து தமிழ் தினத் தாள் 30-11-2014 ல் வெளியான என் கருத்து

அடக்கவும் வேண்டாம் எதிர்க்கவும் வேண்டாம்

நம் நாட்டு இளைஞர்கள் வாழ்வில் சாதிக்க எவ்வளவோ விஷயங்கள் இருக்க, இந்தப் போராட்டம் தேவையில்லாதது. தொலைக் காட்சிகளில் வரும் வேடிக்கை விளையாட்டு நிகழ்ச்சிகளில் பங்கு பெறுவோர் கட்டியணைத்து முத்தமிட்டுக் கொள்ளுவதைப் பார்க்கவே சகிக்கவில்லை. இதில் தெருத் தெருவாக முத்தமா? முத்தம் என்பதற்கான சிறப்புத் தன்மையே காணாமல் போய்விடும்.

அம்பிகை மூவர்

20-07-2014 அன்றைய தீபம் இதழில் பிரசுரமான என் ஆலய தரிசனம்... ஈரோடு கோட்டை மாரியம்மன் ஆலயம்...   நம் தமிழ்நாட்டில்  சங்க காலத்தில் சேர, சோழ,பாண்டிய நாடுகளுடன் தொண்டை, கொங்கு நாடுகளின் ஆட்சியும் சிறப்பாக இருந்து வந்தது. கொங்கு 24 சிறு உள்நாடுகளாகப் பிரிக்கப்பட்டது. இவற்றில் வரலாற்றுச் சிறப்பும், பழமையும், சங்க காலச் சிறப்பும் பெற்ற பூந்துறை நாட்டின் புகழ்மிக்க பெருநகரமாக விளங்கும் ஈரோட்டில் பல ஆலயங்கள் பழமைச் சிறப்புப் பெற்று விளங்குகின்றன. கோவை உள்ளிட்ட கொங்கு மண்டலத்தில் தாய் சக்தியே தெய்வமாகக் கொண்டாடப்படும் மாரியம்மன் வழிபாடு மிகப்  பிரசித்திபெற்றது. அங்கே, அம்மன் பல்வேறு கோலங்களில் காட்சி தந்து, பக்தர்களுக்கு அருள் பாலிக்கிறாள். மாரி, காளி, தேவி, பகவதி, மகமாயி, பச்சையம்மன், பாஞ்சாலி, நீலியம்மன், பிராட்டியம்மன், வஞ்சியம்மன், பெரியம்மன், வெள்ளையம்மன், பார்வதி....இப்படி அந்த தேவிக்குத்தான் எத்தனை எத்தனை நாமங்கள்! ஈரோடு நகரின் நடுநாயகமாக, காவல் தெய்வமாக, நகர மக்களின் ஆதார தெய்வமாகக் காட்சி தரும் பெரியமாரியம்மன் ஆலயம்  இவ்வூரின் மிகப் பிரசித்தி பெற்ற ஆலயமாகும். இரண்டு ஓடைகளுக்கு நடுவே அமைந்தது 'ஈரோடை'. அதுவே, மருவி 'ஈரோடு' என்றாகியது. இவ்வூர் ஈசனின் பெயர் 'ஆர்த்திர கபாலீஸ்வரர்' என்பது. ஈசனின் தலையில் கங்கை இருந்து எப்போதும் ஈரமாக இருப்பதால் 'ஈர ஓடு' என்பதே ஈரோடு ஆயிற்று என்றும், காளிதேவி பிரம்மன் தலையைத் துண்டாக்கியபோது ஈரமான தலையின் ஒட்டுப்பகுதி விழுந்ததால் இப்பெயர் எனவும் பல கூற்றுகள் உள்ளன.  இவ்வூருக்கு மறந்தை, உறந்தை, மயிலை, மத்யபுரி, கபாலபுரி என்ற பெயர்களும் உண்டு. இவ்வூர் சேரரும், பாண்டியரும், விஜய நகர அரசரும், மைசூர் உடையாரும் ஆட்சி புரிந்த சிறப்புடையது. மைசூர் மன்னர்களுக்கு எதிரான போராட்டத்தில், அவர்களின் மூக்கை அறுத்து வெற்றி நிலை நாட்டிய 'மூக்கறுப்போர்' என்ற வரலாற்று சிறப்பு மிக்க சம்பவம் நிகழ்ந்தது இங்குதான். தந்தை பெரியாரும், கணித மேதை ராமானுஜமும் பிறந்த ஊர் ஈரோடு. பருத்தி ஆடைகளுக்கும், பெண்களின் மங்கலப் பொருளான மஞ்சள்  தயாரிப்பிலும் முதலிடம் வகிக்கும் நகரமான  ஈரோடு சிறந்த தொழில் நகரமாக விளங்குகிறது. சமயபுரம், கண்ணனூர் மாரியம்மன், தஞ்சை முத்துமாரியம்மன், கோவை தண்டுமாரியம்மன், சேலம் கோட்டை மாரியம்மன், பண்ணாரி மாரியம்மன், படவேட்டம்மன், இருக்கன்குடி மாரியம்மன், கருமாரியம்மன்  போன்று ஈரோட்டின் கோட்டை மாரியம்மன் ஆலயம் மிகப் பெருமை பெற்றது. மாரி என்பதற்கு மழை என்று பொருள். வெப்பு நோயாகிய அம்மை நோயைத் தீர்க்கும் குளிர்ச்சியான தெய்வம் என்பதே மாரி என்பது நாம் அறிந்ததே. அம்மை நோயுண்டானது எப்படி? பரசுராமரின் தந்தை ஜமதக்னி முனிவர் இறந்தபோது அவர் மனைவி ரேணுகாதேவி தீக்குளித்தாள். அச்சமயம் அவளைக் குளிர்விக்க இந்திரன் மழை பொழியச் செய்தான்.அவள் அணிந்திருந்த ஆடைகள் எரிந்து, உடல் முழுதும் தீ கொப்புளங்கள் ஏற்பட்டன. அவள் தன்  உடலை மறைக்க அங்கிருந்த வேப்பிலையை ஆடையாகத் தரித்து, பசிக்கு அருகிலிருந்த புலைச்சேரியில் உணவு வேண்டினாள். அவர்கள் ரேணுகாவை வேதியப் பெண்ணாகக் கருதி பச்சரிசிமாவு, இளநீர், பானகம், வெல்லம் இவற்றை உணவாகக் கொடுத்தனர். தன கணவரின் உடலைக் கண்டு கதறி அழுத அவளை தேவர்களும், சிவபெருமானும் தேற்றி, 'நீ சக்தி வடிவமாதலால் கிராம தெய்வமாக விளங்கி மக்களைக் காப்பாற்று' என ஆணையிட்டார். அவள் உடம்பில் ஏற்பட்ட கொப்புளங்கள் உலகினருக்கு அம்மை நோய் ஆயிற்று. உடுத்திய வேப்பிலை மருந்தாயும், அவள் உண்ட இளநீர், பானகம், அரிசிமாவு, வெல்லம் இவை உணவாகவும் ஆயிற்று. ஈரோடு மாரியம்மனின் அருமை, பெருமைகளைச் சொல்ல வார்த்தையில்லை. தீவினைகளை அறுத்து, நல்வினைகள் நல்குவதில் வல்லவள் இந்த மாரியம்மன். இவளுக்கு பெரிய என்ற அடைமொழி ஏன்? இவளுடன் கூட அருள்புரியும் சக்திகளாக எழுந்தருளியுள்ளனர் சின்ன மாரியம்மன் என்னும் நடுமாரியம்மனும், வாய்க்கால் மாரியம்மனும். இம்மூவருமே ஈரோடு நகரை அல்லும், பகலும் அறனுறக் காத்து அல்லவை நீக்கி, நல்லன செய்து செல்வ வளமிக்க நகரமாக வைத்துள்ளனர். ஈரோட்டுக்கு பெருமை சேர்த்து, சக்தி வாய்ந்த காவல் தெய்வமாக விளங்கும் தேவியே, "கோட்டை பெரிய மாரியம்மன்." மாமன்னர்கள் கோட்டை கட்டி ஆண்டதால் இப்பகுதிக்கு கோட்டை என்றே பெயர். அம்மனுக்கும் கோட்டை மாரியம்மன் என்று அடைமொழி ஆகிவிட்டது.  1200 ஆண்டுகளுக்கு முன்பு கொங்கு சோழர்களால் கட்டப்பட்ட ஆலயம். ஈரோடு நகரின் பிரதான சாலையான பிரப் சாலையில் நகராட்சி அலுவலகம் எதிரே வடக்கு நோக்கி அமைந்துள்ளது. இவ்வாலயம் மிகவும் பழமையானது. ஆலயத்தில் உள்நுழைந்ததும் சிம்ம வாகனம் அழகுடன் காட்சி தருகிறது. கருவறையின் முன் இரு அழகிய வண்ண துவாரபாலகர்கள்  ஆண், பெண் பூதங்களாக இருபுறமும் விளங்குகின்றனர்.  கருவறையில் அம்மன் அழகுறக் காட்சி தருகிறாள்.சிறிய உருவம்; கருணை பொழியும் கண்கள்.புன்னகை ததும்பும் அதரங்கள்;சிரத்தில் உயர்ந்த கொண்டை; மேலிரு கரங்களில் உடுக்கையும், பாசமும்; கீழ்க் கரங்களில் கபாலமும், கத்தியும் கொண்டு இடக்கால் மடித்து, வலக்கால் தொங்கவிட்டு அமர்ந்த கோலம். நம் கவலைகளையும், துன்பங்களையும் அக்கணமே களைந்து, வேண்டுவதையும், விருப்பத்தையும் நிறைவேற்றக் காத்திருக்கும் அதிரூப சுந்தரியாகக் காட்சி தரும் மகாமாரி அன்னையின் அழகில், வசீகரத்தில் உலகமே மறந்து உன்னத நிலையை அடைந்துவிட்ட எண்ணம் உண்டாகிறது. ஆசைகள் மறந்து, அன்னையே அனைத்தும் என்ற ஆனந்த நிலை ஏற்படுகிறது.நினைத்ததை நடத்திக் கொடுத்து, கேட்டதைத் தரும் பரமேஸ்வரியாகக் காட்சி தருகிறாள் தேவி. அந்தப் பரவச நிலையில் நாம் அன்னையை வலம் வருவோம்.அம்பிகையின் இடப்புறம் கையில் கோடரி ஏந்திய பரசுராமரின் சிலாரூபம் அமைந்துள்ளது. தாய் ரேணுகாவின் தலையை தந்தை சொற்படி துண்டித்த பரசுராமன், பின் தாயின் உயிரையே வரமாகக் கேட்டுப் பெற்றார். தாயின் உடல் கிடைக்காமல் போக, அவள் தலையை வேறு உடலில் பொருத்தியதால் அவளே 'மாரி'ஆனாள்  என்பது புராண வரலாறு. அதன் பொருட்டே தாயாகிய மாரியம்மனின் ஆலயங்களில் பரசுராமரும் உடனிருப்பதாக ஐதீகம். அர்த்த மண்டபத் தூணில் நர்த்தனக் கண்ணன், யாளி, சிம்ம உருவங்கள் உள்ளன.கோவில் தல விருட்சம், வேப்பமரம்.  இவ்வாலயத்தின் இணை ஆலயங்களான சின்ன மாரியம்மன், வாய்க்கால் மாரியம்மன் ஆலயங்களில் உள்ள தேவியரும் இந்த அன்னைக்கு இணையாக அருள் தரும் வரப்பிரசாதிகள் சின்ன மாரியம்மன் ஆலயத்தில்  இருபுறமும் கணபதியும், முருகனும் வீற்றிருக்க, மகாமண்டபத்தில் காட்சி தரும் துவாரபாலக, பாலகியரைத் தாண்டி கருவறையில் முத்தலைச் சூலம், பாம்பு, கத்தி, கபாலத்துடன் கிழக்கு நோக்கி அமர்ந்து அன்னை அருட்கோலம் காட்டியருள்கிறாள். பக்தர்கள் வேண்டும் வரங்களைத் தரும் தயாபரியாகக் காட்சி தருகிறாள் அன்னை. இவ்வாலயத்தில் மட்டுமே அழகிய மர வேலைப்பாடுகளுடன் கூடிய தேர் உண்டு. இந்தத் தேரோட்டமே பங்குனியில் நடைபெறும். மேலும் அன்னவாகனம், சிம்ம வாகனம், கிளுவைமர வாகனங்களும் உண்டு. அம்மனுக்கு அமாவாசை தோறும் புஷ்பப் பல்லக்கில் திருவீதி உலா நடக்கும். காளிங்கராயன் வாய்க்காலுக்கு மேல்புறம் அமைந்துள்ளது மூன்றாவது மாரியம்மன் ஆலயமான வாய்க்கால் மாரியம்மன் ஆலயம். இது சிறிய ஆலயம். பலிபீடம், சிம்மம் இவற்றைக் கடந்து சென்றால் கருவறையில் கத்தி, சூலம்,பாசம், கபாலம் தாங்கிய நான்கு கரங்களுடன்,அன்பு ததும்பும் விழிகளுடன் அன்னையின் திருவுருவம் காட்சியளிக்கிறது. தரிசிப்போரின் பாவங்களை இல்லாதாக்கி, வாழ்வை சீர்படச் செய்யும் பரமதயாளியாகக் காட்சி தருகிறாள் பிருகந்நாயகி. ஆலயத்தின் எதிரில் காளியம்மன், ஹனுமானின் தொன்மையான சிற்பங்கள் உள்ளன. இவ்வாலயத்தின் அருகிலுள்ள காரைவாய்க்கால் மைதானம் முன்பு 'காந்தி சவுக்' என்று அழைக்கப்பட்டதாம். இங்கு மகாத்மா காந்தி, நேரு, பாரதியார் போன்ற தேசத்தலைவர்களின் பொதுக்கூட்டங்கள் நடைபெறுமாம். இவ்விடத்தில் பேசாத தலைவர்களே இல்லையாம். அத்தனை புகழ் பெற்ற மைதானமாம் இது. பங்குனி முதல் செவ்வாயில் ஆரம்பித்து 20 நாட்கள் நடக்கும் மாரியம்மனின் பங்குனித் தேர்த் திருவிழா மிகப் பிரம்மாண்டமான பெரிய திருவிழா. முப்பது அடி உயர தேரில் நான்கு முனைகளிலும் அழகிய யானைகள் தாங்குவது போன்ற சிற்பங்கள் கண்ணைக் கவரும். இத்தேர் முழுவதும் முருகன் மற்றும் சிவபெருமானின் திருவிளையாடல் காட்சிகளும், வீணை, குழல், மத்தளம் வாசிப்போரின் சிற்பக் காட்சிகளும் உள்ளன.தேரோட்ட்த்தன்று அம்மன் அழகிய அலங்காரத்துடன்  பவனி வருவதைக் காணக்  கண் கோடி வேண்டும். பங்குனி முதல் செவ்வாய்க் கிழமை அன்று இரவு மூன்று ஆலயங்களிலும் பூச்சாட்டுதல் நடைபெறும். அடுத்துவரும் சனிக்கிழமை அன்று கம்பம் நடப்படும். கம்பம் நடுவது என்றால் என்ன? பால் உள்ள மரங்களான வேம்பு, பாலை, ஆல் , அரசு, பாச்சா ஆகிய ஐந்து மரங்களில் ஒன்றின், இரு கிளைகள் உள்ள மரத்துடன் மூன்றாம் கிளையை இணைத்து ஆசாரி உருவாக்கிய கம்பத்தை அடிமரத்துடன் நட்டு பூசாரி. அதற்கு விபூதி, சந்தானம், குங்குமம், நவதானியம், வேப்பிலை, மாலை அணிவிப்பார். மூன்று கிளைகள் அமைப்பதற்கு மும்மூர்த்திகள் எழுந்தருள்வதாயும், மாரியம்மன் மூவுலகத்துக்கும் தலைவி என்றும் பொருளாம். மறுநாள்முதல் சிறுவர், சிறுமியரும் ஊர்ப் பெண்களும் மஞ்சள் நீரில் வேப்பிலை செருகி கம்பத்திற்கு ஊற்றுவர். இங்கு, கம்பம் தேவியின் அம்சமாகக் கருதப்படுகிறது. மூன்று மாரியம்மன் கோவில்களிலும் பெண்கள் கூட்டம் அலைமோதும். கம்பம் நட்டதும், தினமும்  பெண்கள் மஞ்சள் நீரை விடுவர். அது தேவியை அபிஷேகம் செய்வது போலாகும். கம்பத்திற்கு நீர் ஊற்றும்போது நாம் வேண்டிக்கொள்வது விரைவில் நிறைவேறும் என்பது நம்பிக்கை. பதினைந்தாம் நாள் குண்டம் தீ மிதித்தல், இரவு மாவிளக்கு, கரகம் ஆகியவை நடைபெறும். பதினாறாம் நாள் பொங்கல் வைக்கும் திருவிழா. அன்று காலை சின்ன மாரியம்மன் ஆலயத் தேர்த்திருவிழா வெகு விமரிசையாக நடைபெறும். மூன்று நாட்களுக்கு தேர் ஆலயத்தின் சுற்று வீதிகளில் வலம் வந்து 18ம் நாள் நிலைக்கு வரும். பின் பத்தொன்பதாம் நாள் கம்பம் எடுக்கும் விழா நடைபெறும். மூன்று ஆலய கம்பங்களும் நகரின் முக்கியத் தெருக்களின் வழியாக எடுத்துச் செல்லப்பட்டு, காளிங்கராயன் வாய்க்காலில் விடப்படும். அப்போது, பக்தர்கள் ஒருவர் மீது ஒருவர் மஞ்சள் நீரை ஊற்றி விளையாடி மகிழ்வர். மஞ்சள் நகரம், மஞ்சள் நீரில் குளிக்கும்! அது, வடநாட்டு 'ஹோலி' என்ற பண்டிகையை நினைவூட்டும். திருவிழாவின்போது தினமும் ஒரு வாகனத்தில் அன்னையின் வீதியுலா நடக்கும். தினமும் ஊரெங்கும் இன்னிசை, நாட்டியம், நாடகம் போன்ற கலை நிகழ்ச்சிகள் விமரிசையாக நடைபெறும் அந்த 20 நாட்களும் ஊரே அமர்க்களமாக இருக்கும். திருவிழா முடிந்ததும் ஊரே வெறிச்சோடியது போல் இருக்கும்.  பெரிய மாரியம்மன், பக்தர்கள் வேண்டியதை, விரும்புவதை நிறைவேற்றும் சக்தி கொண்டவள். அம்மை உள்பட, வெப்பத்தால் வருகிற நோய்களை விரைவில் குணப்படுத்தித் தருவாள், இவள் பிள்ளைவரம் தரும் அம்மன். குழந்தை இல்லாதவர்கள் தொடர்ந்து 45 வெள்ளிக்கிழமை இங்கு அர்ச்சனை செய்து, வழிபட்டு வந்தால் கைமேல் பலன் கிடைக்கும். இதில் பயன் பெற்றோர் பலராம். ஆலயங்கள் மூன்றும் மிகச் சிறப்பாகப் பராமரிக்கப் படுகின்றன. தினமும் 50 பேருக்கு சிறப்பான முறையில் அன்னதானம் நடைபெறுகிறது.  மொத்தத்தில் ஈரோடு மக்களின் இதய தெய்வமாக விளங்குகிறாள் பெரிய மாரியம்மன். ஆடி, தை மாத வெள்ளிக் கிழமைகளிலும், நவராத்திரி நாட்களிலும் அன்னைக்கு அலங்காரம், சிறப்பு பூஜைகள் உண்டு.  தினமும் காலை 6 மணிக்கு காலசந்தியும், பகல் பன்னிரண்டு மணிக்கு உச்சிக்கால பூசையும்,மாலை 71/2 மணிக்கு சாயரட்சையும் நடைபெறும். ஆலய தரிசன நேரம் காலை 6 முதல் 11.மாலை 4 முதல் 8 மணிவரை. ஈரோடு பேருந்து நிலையம், ரெயில் நிலையங்களிலிருந்து பெரிய மாரியம்மன் ஆலயத்திற்கு பேருந்து, ஆட்டோவில் செல்லலாம். தொடர்புக்கு...0424 2258670

ஆலயம் கண்டேன்.....வீரபத்ரேஸ்வரர்

ஜூலை 5, 2015ல் வெளியான தீபம் இதழில் பிரசுரமான என் ஆலய தரிசனம் கட்டுரை    பட்டிசீமா ஸ்ரீவீரபத்ர சுவாமி ஆலயம் ஆந்திர பிரதேசம் ஒரு புண்ணிய பூமியாக விளங்குகிறது. ஆண்டவன் தானே சுயம்புவாகக் கோவில் கொண்ட ஆலயங்கள் பல சிறப்புற விளங்குகின்றன. ஊரின் செழுமைக்கு கோதாவரியும், அங்கு வாழும் மக்களின் வளமான வாழ்விற்கு  ஆலயங்களில் கோவில் கொண்டிருக்கும் அற்புத தெய்வங்களும் துணையாக இருக்கின்றன. அங்குள்ள சிறு ஆலயங்கள் கூட சிறந்த புராண, இதிகாசப் பெருமைகளுடன் விளங்குகின்றன. பின் தெய்வங்களின் சக்திக்கு கேட்பானேன்? அத்தனை கடவுளரும் வரப்பிரசாதியாகத் திகழ்கின்றனர். சிவபெருமானுக்கும், நரசிம்ம சுவாமிக்கும், மகாலட்சுமி, பார்வதி தேவியருக்கும் அளவில்லா ஆலயங்கள் உள்ளன. 'பஞ்சராம ஸ்தலங்கள்' என்னும் ஐந்து சிவாலயங்கள் ஆந்திராவின் மிகச் சிறப்பான ஆலயங்களாகும். தனிச் சிறப்பும் பெருமையும் கொண்டஸ்ரீ வீரபத்ர சுவாமி ஆலயம்  மேற்கு கோதாவரி மாவட்டத்தில் ராஜமுந்திரிக்கு அருகிலுள்ள 'பட்டிசீமா' என்ற இடத்தில் அகண்ட கோதாவரி நதிக்கு நடுவில் ஒரு சிறிய குன்றின்மேல் அமைந்துள்ளது. சிவபெருமானால் உருவாக்கப்பட்ட வீரபத்ர சுவாமி இங்கு லிங்க ரூபத்தில் கோவில் கொண்டு அருள்பாலிக்கிறார். தட்சிண காசி' எனப்படும் இந்தத் தலம் 'பஞ்ச  ஷேத்ரம்' எனப் படும் ஐந்து சிவாலயங்களுள் ஒன்றாகச் சிறப்பித்துக் கூறப்படுகிறது.மற்ற ஐந்து தலங்கள்  கேதார்நாத், காசி, ஸ்ரீசைலம், காளஹஸ்தி ஆகியவையாம். இத்தல இறைவனை தரிசித்தால் மற்ற ஆலயங்களையும் தரிசித்த புண்ணியம் கிடைக்கும் என்று கூறப்படுகிறது. ஸ்கந்த புராணத்தில் இத்தலம் கைலாயமாகவும், வைகுண்டமாகவும் சிறப்பாகப் போற்றப்படுகிறது. இயற்கை அழகு நிறைந்த இந்த 'தேவகூடபர்வத்'  என்ற இந்தக் குன்று இங்கு உருவானது எப்படி? இதற்கு ஒரு சுவாரசியமான ஒரு கதை  புராணத்தில்  கூறப்படுகிறது. முன்காலத்தில் எல்லா மலைகளுக்கும் சிறகுகள் இருந்தனவாம்! அவை அவற்றின் உதவியுடன் பூலோகம் முழுதும் சுற்றி வருமாம்.தாம் விருப்பப்படும் இடத்தில் இறங்கி விடுமாம். அச்சமயம் அங்குள்ள பல உயிரினங்களுக்கும் துன்பம் ஏற்பட்டதால் இந்திரன் அவற்றின் சிறகுகளை வெட்டிவிட்டான்.      கைலாச மலையின் பெருமையைப் பற்றி அறிந்த இம்மலை தானும் சிவபெருமானைத் தன்னில் சுமந்து கைலாயத்திற்கு இணையான பெருமையையும்,புகழையும் பெற விரும்பி சிவபெருமானை நோக்கித் தவம் செய்தது.சிவபெருமானும் அம்மலைக்கு காட்சி தந்து ' என்ன வரம் வேண்டும்' எனக் கேட்க, அம்மலை 'என்னில் தாங்கள் வீற்றிருந்து எனக்கு அருள் புரிய வேண்டும்' எனக் கேட்க சிவபிரானும் 'அப்படியே' என்று கூறி மறைந்தார். அதுமுதல் அம்மலை ' தேவ குடாத்ரி' எனப் பெயர் பெற்ற கோதாவரி நதியின் நடுவில் அமைந்திருப்பதால் 'தேவகூடபர்வதம்' என்ற பெயரைப் பெற்றது. அன்னை பார்வதி தேவியின்  தந்தையான தக்ஷன் பிருகஸ்பதி யாகம் செய்த சமயம், சிவனை அழைக்காது அவமதித்தான். ஆனால் தேவியோ தான் மட்டும் செல்வதாகக் கூறி அங்கு செல்ல, தந்தை தன்னையும், தன் கணவரையும் அவமதித்ததால், கோபம் அடைந்தாள். திரும்ப சிவபெருமானிடம் செல்ல விருப்பமில்லாமல் தன்  இடதுகால் சுண்டுவிரலை தரையில் தேய்த்து அக்னியை உண்டாக்கி அதில் தான் வீழ்ந்து உயிர் துறந்தாள். இறைவியின் செயலை அறிந்த சிவபெருமான் அளவற்ற கோபத்துடன், தன் விரிந்த தலையில் இருந்து ஒரு கேசத்தைப் பிடுங்கி தரையில்  போட்டு தன் அம்சமாக வீரபத்திரரை உருவாக்கினார். அவர் ஈசனை வணங்கி நின்று தான் செய்ய வேண்டியது யாது? என வினவ, கோபமுற்ற இறைவன் தக்ஷனின் யாகத்தையும், அவனையும் அழித்து வருமாறு, 'பட்டாயுதம்' என்ற வாள்  போன்ற ஒரு ஆயுதத்தைக் கொடுத்தார். வீரபத்ரரும் தந்தை கூறியது போன்றே யாகத்தை அழிக்க சென்றபோது தடுக்க வந்தனர்  மகாவிஷ்ணுவும்,சூரிய பகவானும். ஆனால் அளவற்ற கோபத்தில் இருந்த வீரபத்ரரோ மகாவிஷ்ணுவின் சக்ராயுதத்தைப் பிடுங்கியதோடு, சூரிய தேவனின் பற்களையும் உடைத்துவிட்டார்.    யாகத்தை அழித்து, தக்ஷனின் தலையையும் வெட்டிவிட, யாகத்தை முடிக்க தக்ஷனுக்கு அருள வேண்டும் என தேவர்கள் வீரபத்ரரை வேண்ட, தக்ஷனுக்கு ஒரு வெட்டுப்பட்ட ஆட்டின் தலையைப் பொருத்தி யாகத்தை முடித்து அவனுக்கு மோக்ஷம் கிடைக்கச் செய்தார்.தக்ஷனின் உயிரை மாய்த்து அந்த பட்டாயுதம் விழுந்த இடமே 'பட்டாசலக்ஷேத்ரம்' எனப்பட்டு, பின்னாளில் மருவி பட்டிசீமா ஆயிற்று.  பின்பும் தன் கோபம் குறையாமல் பிரளய தாண்டவம் ஆடிய வீரபத்ரரைக் கண்டு சப்த லோகங்களும் நடுநடுங்கின. தேவர்கள் ஈசனிடம் சென்று சதி தேவியை மீண்டும் உயிர்ப்பிக்க வேண்டினர்.அந்த நேரத்தில் தோன்றியவளே மகாபத்ர காளி தேவி.தேவர்கள் அகத்திய முனியிடம் சென்று வீரபத்ரரை அமைதியாக்கி,  தம்மைக் காக்க வேண்டினர். அகத்தியர் வீரபத்ரரை  தன்னுடைய இரு கைகளாலும் இறுக அணைத்து, அவரது கோபத்தைத் தணித்து சாந்தமாக்கி, தேவ கூட பர்வதத்தில் அமர்ந்து அருளும்படி வேண்ட, உக்கிரம் குறைந்த வீரபத்ரரும் அவ்வாறே அம்மலையில் சுயம்புலிங்கமாக உருக் கொண்டார்.  அவரது கலைந்து, பிரிந்து கிடந்த கேசத்தை அகத்தியர் ஒன்றாக்கி முடிந்துவிட்டார். இன்றும் அந்த சிவலிங்கத்தின் தலையில் சற்று உப்பலாக சடை முடிந்தது போன்றும், லிங்கத்தின் நடுப்பகுதியில் அகத்தியர் கைகளால் கட்டிய தழும்புகளும் இருப்பதைக் காண முடிகிறது.ஆலயம் செல்வதற்கு கோதாவரி நதியை படகில் கடந்து செல்ல வேண்டும். அமைதியுடன் ஓடும் கோதாவரி நதியும், சுற்றிலும் பசுமை நிறைந்த இயற்கைக் காட்சிகளும் மனத்தைக் கொள்ளை கொள்கின்றன.மழை நாட்களில் இக்குன்று மூழ்கும் அளவு தண்ணீர் நிரம்பி விடுமாம். படகு ஏறும் இடத்தில் நீண்டு, உயர்ந்து நின்று காட்சி தரும் ஆஞ்சநேயர் மிக அழகு.  வெண்ணிற கோபுரத்துடன் பளிச்சென்று காட்சி தரும் ஆலயத்திற்கு சில படிகள் ஏறிச் செல்லவேண்டும். இங்குள்ள நந்தி மிக அற்புதமாக செதுக்கப்பட்டுள்ளது. பன்னிரண்டாம் நூற்றாண்டில்  ராஜ மகேந்திர வர்மானால் கட்டப்பட்ட மிகப் பழமையான கோயில்.கர்ப்பக்கிரகத்தில் ஆவுடையுடன் கூடிய சிவ  லிங்கத்தைக் காணும்போதே வீரபத்ரரின் தாண்டவம் நினைவுக்கு வருகிறது. வேண்டும் வரங்களை அனைவருக்கும் அள்ளித்தரும் வள்ளலாம் இவர். இங்குள்ளோர் தமக்கு என்ன துன்பம் வரினும் இந்த இறைவனை வேண்டிக் கொண்டால் அவை உடன் அகன்று விடுமாம். அர்ச்சகர்கள் மிக அற்புதமாக ஸ்ரீருத்ரம் சொல்லி அபிஷேகம் செய்கிறார்கள். இது ஆந்திராவில் நான் எல்லா ஆலயங்களிலும் கண்டு வியந்த விஷயம்.  ஒவ்வொரு  சன்னதியிலும் அங்கு இருக்கும் அத்தனை பேர் (சிறு குழந்தைகள் உட்பட) கையிலும் ஒரு பூவைக் கொடுக்கிறார்கள். பின் திரும்ப வந்து அனைவரின் பெயர், கோத்திரம், நட்சத்திரம் கேட்டு கொடுத்த பூவை வாங்கிச் சென்று அவற்றால் இறைவனுக்கு அர்ச்சனை செய்து விபூதி பிரசாதம் தருகிறார்கள். அர்ச்சனைதட்டு கொடுத்தால் மட்டுமே அவர்கள் பெயருக்கு அர்ச்சனை, பிரசாதம்  என்ற பாகுபாடு இன்றி அனைவரையும் இறைவன் முன் சமமாகக் கருதும் இப்பூஜை முறை மிக அதிசயமாக இருக்கிறது.ஒரு சின்னக் கோவிலிலிருந்து புகழ் பெற்ற மிகப் பெரிய கோவில்வரை இந்த நடைமுறை கடைப் பிடிக்கப்படுகிறது.  நான் சமீபத்தில் சில மகிமை பெற்ற தமிழ்நாட்டு ஆலய தரிசனத்துக்கு சென்ற சமயம், தீபாராதனை காட்டி தரும் விபூதியை கொஞ்சம் அதிகமாகத் தரும்படி வேண்டியபோது, அர்ச்சகர் 10 ரூபாய் கொடுத்தால் மட்டுமே விபூதி பொட்டலம் கொடுப்பதாகச் சொன்னார்.  கடவுள் சன்னதியிலேயே இப்படி பணம் வசூலிப்பதை என்னென்பது? எல்லாமே ஒரு வியாபாரம் போல ஆகி விட்டதே  என்று மனம் வருந்தியது.  சுற்றுப் பிரகாரத்தில்  தேவி பத்ரகாளியின் சந்நிதி உள்ளது. அழகே உருவாய் காட்சி தரும் தேவியின் முன் நிற்கும்போது நம் கவலைகள் காணாமல் போய் நிம்மதி ஏற்படுகிறது. தீர்க்க சௌமாங்கல்யம், திருமணம், மக்கட்பேறு என்று எல்லா செல்வங்களும் இவளை மனமாறப் பிரார்த்தித்தால் சித்திக்குமாம். வெள்ளிகிழமை மற்றும் நவராத்திரி நாட்களில் அம்மனின் அலங்காரம் அருமையாக இருக்குமாம். இங்கு தரிசனம் செய்யும் பெண்களுக்கு அம்மனின் பிரசாதமாக கண்ணாடி வளையல்களைத் தருகிறார்கள்.  லக்ஷ்மி கணபதி, குமாரசுவாமி, சுப்ரமணிய சுவாமி, மஹிஷாசுர மர்த்தனி,  கனகதுர்கா, தாண்டவ வீரபத்ரர், சரஸ்வதி  ஆகிய தெய்வங்களுக்கு சன்னிதி உள்ளது. கோவிலின் சுற்றுச் சுவர்களில் பல அழகிய நடன வடிவங்கள் கண்ணைக் கவரும் விதமாக வடிக்கப் பட்டுள்ளன.  இவ்வாலயத்துடன் இங்கு அமைந்துள்ள ஸ்ரீபவநாராயணர் ஆலயமும் மிக அற்புதமாக உள்ளது. இதற்கும் ஒரு வரலாறு உண்டாம். அங்கிருந்து சில மைல் தூரத்தில்தான் கஜேந்திர  மோட்சம் நடைபெற்றதாகவும், அந்தப் பெருமாளே இங்கு காட்சி தருவதாகவும் கூறினார். பவநாராயணரின் உருவம் மிக அழகாக உள்ளது.பூதேவி, நீளாதேவி சகிதம் காட்சியளிக்கும் அவர் கைகளில்  சங்கும், சக்கரமும் இடம் மாறியுள்ளது. கஜேந்திரனுக்காக விஷ்ணு அவசரமாக சென்றதால் அவை இடம் மாறியிருப்பதாக காரணம் சொன்னார் அர்ச்சகர்.  இத்துடன் ஒரு ராமர் ஆலயமும், ஆஞ்சநேயர் ஆலயமும் உள்ளது.இங்கு மகாவிஷ்ணு க்ஷேத்திர பாலகராக இருந்து இம்மலையைக் காப்பதாக புராணக் கூற்று. சிவனுக்கும், விஷ்ணுவுக்கும் சேர்ந்துஇங்கு ஆலயம் உள்ளதால் இது 'ஹரிஹர க்ஷேத்ரம்' எனப்படுகிறது. சைவ, வைஷ்ணவ ஒற்றுமைக்கு ஒரு எடுத்துக் காட்டாக இவ்வாலயம் விளங்குகிறது.  ' இவ்வாலயத்தின் மிகச் சிறப்பான திருவிழா சிவராத்திரியாகும்.அந்த ஒரு நாளில் மட்டும் இங்கு ஒரு லட்சம் மக்களுக்கு மேல் வந்து தரிசிப்பார்களாம்.மற்றும் சாரதா நவராத்திரி, சைத்ர நவராத்திரி, பீஷ்ம ஏகாதசி ஆகிய நாட்கள் மிக விமரிசையாகக் கொண்டாடப்படுகிறது. மன்னன் ராஜ மகேந்திர வர்மனின் பெயராலேயே அந்நகருக்கு 'ராஜமகேந்திரவரம்' என்ற பெயர் ஏற்பட்டு பின் அதுவே இன்றைய 'ராஜமுந்திரி' ஆயிற்று. இவ்வாலயம் ராஜமுந்திரியிலிருந்து 40 கிலோ மீட்டர் தூரத்தில் அமைந்துள்ளது.ஆந்திரா சுற்றுப் பயணம் செல்பவர்கள் அவசியம் தரிசிக்க வேண்டிய கோயில் இது. ஆலயத்தில் தினமும் ஆறுகால பூஜைகளும், தனிப்பட்ட நிவேதனமும் உண்டு. இங்கு பிள்ளைப் பேறு தரும் தெய்வங்களாக அனிஸ்த்ரீ, புனிஸ்த்ரீ என்ற இரண்டு பெண் தெய்வங்கள் வழிபடப் படுகின்றனர். இவர்களை வேண்டிக்கொண்டு குங்கும அர்ச்சனையும், புஷ்பா அலங்காரமும் செய்தால் மழலைச் செல்வம் இல்லாதோர் விரைவில் பிள்ளைப்  பேறு  அடையலாம் என்று சொல்லப்படுகிறது.    இவ்வாலயத்திற்கு ராஜமுந்திரியிலிருந்து பஸ், டேக்சியில் சென்று கோதாவரி நதியைப் படகில் கடந்து செல்லவேண்டும். ராஜமுந்திரியிலிருந்து  பேக்கேஜ் டூர்களிலும் செல்லலாம்.  ஆலயத்தில்  காலை 7 மணிமுதல் 1 மணி வரையும், மாலை 4 முதல் 7 மணி வரையும் தரிசனம் செய்யலாம்.சிவராத்திரி அன்று இரவு முழுதும் அபிஷேகம் உண்டு. ஸ்ரீ பத்ரகாளி அம்மன்  சமேத ஸ்ரீவீரபத்ரசுவாமியின் சிறப்பான  ஆலயங்களுள் முதன்மையான ஆலயமாக இது போற்றப் படுகிறது